សៀមរាប៖ ប្ដីប្រពន្ធលក់អនឡាញនៅក្នុងខេត្តសៀមរាបដែលជេរប្រមាថភ្ញៀវផ្ទុះការរិះគន់ពីមហាជនកាលពីម្សិលមិញនេះបានចេញលិខិតសុំទោសដែលសរសេរដោយបុរសជាប្ដីដោយផ្ទាល់ដៃនិងពិបាកអានជាខ្លាំង។

អ្នកយកព័ត៌មានយើងខ្ញុំខំប្រឹងពិនិត្យផ្ទៀងទៅលើលិខិតនោះយ៉ាងយូរទើបអាចយល់ខ្លឹមសាររបស់បុរសជាប្ដីដែលមានឈ្មោះ ណាក់ ច័ន្ទពិសិដ្ឋ អាយុ២៨ឆ្នាំ សរសេរដែលមានន័យថា លោកនិងប្រពន្ធឈ្មោះ ហ៊ុយ ស៉ីងហ័ង មានអាយុ២០ឆ្នាំពិតជាបានជេរភ្ញៀវពិតមែនហើយមិនត្រឹមតែភ្ញៀវម្នាក់នោះទេគឺមានច្រើនថែមទៀតដែលប្ដីប្រពន្ធពីរនាក់នេះបានជេរប្រមាថ។

ក្នុងលិខិតនោះសរសេរថា៖ «ខ្ញុំបាទនិងភរិយាសុំធ្វើការស្នើសុំការអភ័យទោសចំពោះមជ្ឈដ្ឋានបងប្អូនអ្នកប្រើប្រាស់បណ្ដាញសង្គមហ្វេសបុកទូទៅទាំងក្នុងនិងក្រៅស្រុក ជាពិសេសចំពោះបងប្អូនអតិថិជនរបស់ខ្ញុំដែលពួកខ្ញុំទាំងពីរបានប្រព្រឹត្តល្មើសនាពេលកន្លង»។

ជាមួយនឹងការសុំទោសពីអ្នកប្តីប្រពន្ធខាងលើក៏បានសន្យាថានឹងឈប់ធ្វើការជេរប្រមាថទៅលើភ្ញៀវតទៅទៀតផងដែរ។

នេះជាលើកទីមួយហើយក្នុងប្រវត្តិលក់អនឡាញនៅកម្ពុជា ដែលមានអ្នកលក់ជេរប្រមាថទៅលើភ្ញៀវទាំងប្ដីទាំងប្រពន្ធ ថែមទាំងបញ្ជាឲ្យអ្នកទិញបាញ់លុយឲ្យខ្លួនទាំងដោយខ្លួនឯងជេរប្រមាថអ្នកទិញ ហើយគំរាមបង្ហោះថាអ្នកទិញបោកប្រាស់ថែមទៀត។

មហាជនមួយចំនួនបានកាប់ថ្មចំណាំមុខប្ដីប្រពន្ធ២នាក់នេះ នឹងធ្វើពហិការឈប់គាំទ្រការរកស៉ីរបស់ពួកគេរហូតផងដែរ៕